驀然回首電影觀後感。

上星期五同朋友去睇「驀然回首」首映，因為坐兩位主角及導演後面兩行，所以不斷被傳媒拍照，既然知道避無可避，影大合照時就大大方方出鏡算了。 響未睇過漫畫、未睇過動畫嘅情況下去睇真人版電影，覺得是枝裕和導演拍得真係好靚，春夏秋冬交替感非常強烈，主角小時候同成年版都非常靚女，對於從小鍾意睇日本漫畫同大個做漫畫行業嘅我黎講，尤其觸動。 可能唔係屬於長篇漫畫，所以刻劃佢地成為漫畫家嘅路有d平坦，佢地好輕易就可以得到取錄，我諗好多人都知道，投稿去集英社唔係一件咁簡單嘅事。當年強如鳥山明都投咗好多次，不過呢套唔係《爆漫》，所以唔刻劃太多作者成長其實係正確，用季節去代表時間飛逝係表達得好到位。見到兩位主角畫技進步神速，而且最終能夠成為漫畫家，的確係好熱血。 而故事後段嘅「轉折」都令我非常「意外」，雖然一早已經唔係抱住睇喜劇嘅心情入場，果種戚戚然嘅感覺係有種熟悉嘅味道，離場後先記起應該就係當年睇中山美穗嘅「情書」果種感覺。 我之後有時間一定會睇返藤本樹嘅漫畫版，再對比下睇原著同睇真人版有乜野感覺。

看驀然回首有感。

上星期五看完驀然回首，關於一個非常熱血的追夢故事，想不到看畢後同時也喚起了我一點點的畫畫魂。故事中兩位女主角小四那年因為在校刊裡畫四格漫畫而結緣，後來一起成為了漫畫家，真的好厲害。 還記得我和弟弟小時候也是經常投稿去A-CLUB月刊，除了畫很多A4大小的作品外，也有將四格表格影印下來，一想到新點子就會畫出來寄去投稿，也幸運地，我們分別都刊登過好多次。 那段無憂無慮的日子，最喜歡就是看漫畫、畫漫畫。昨晚同行的朋友和我一起看電影時，問我會否代入當中編輯的角色，其實我下意識代入了漫畫家的角色，因為我和弟弟小時候十分喜歡畫漫畫，以前一放學回家就畫個不停，更「出版」過自己的作品及「成立」了自己的出版社。近日找到了一本小時候一直留到現在的畫簿，當中有我和弟弟的畫作，真的好懷念啊。

《斬魔君鍾馗》導覽本。

上星期終於收到呢本《斬魔君鍾馗》導覽本，多謝sunny幫我搶購同寄書俾我，一睇個陣容就知絕對唔可以錯過，古天樂監製、喬靖夫故事創作、馮展鵬人設、MAN僧負責繪畫，仲有好友肥佬做編輯同阿棠有份畫景，格子團隊絕對係信心保證，未知內容已非常期待。看畢導覽本，覺得故事非常有追看性，有古代穿越現代元素、有科技捉妖、滅鬼技術，又有長生不老嘅半仙人登場。 加上製作非常認真，故事架構宏大，玄幻題材非常吸引，期待年底出書可以再牽起一波搶購熱潮。 其實大家都估到，有古老闆加持，絕對唔會只局限於漫畫，影視化更應該係遲早會發生嘅事，祝新書大賣，早日能夠響大銀幕觀賞。

「元旦好人好事。」今日被推上01熱話！？

話說，剛踏入元旦時，坐屯馬線回家時發生咗一件值得一贊嘅好人好事，於是將件事寫咗黎，第二日同時post上ig、fb及Threads，估唔到Threads嘅觸及面咁廣，一日時間就有接近一萬人睇過個post，仲有好多唔識嘅朋友回應同大贊，今日更見到「01熱話」fb轉載咗我8篇文，而我就化身成「該港鐵乘客」，被記者謝茜嘉報導之後，Threads瀏覽量立即就破咗一萬人。


以下是整段文字： 「一踏入2026年，倒數完冇耐，即遇好人好事，話說琴晚去完元朗燒野食，回程坐屯馬線，對面三個後生仔發現地下有d濕，然後知道係企隔離個叔叔背囊係咁漏水，通知佢開袋一睇，原來係樽裝咖啡未扭實，於是三個後生仔問我地借紙巾，二話不說就幫叔叔抹乾淨地下d咖啡，其間有一位要落車所以幫咗一陣就走咗，其餘兩位小朋友將地下抹到好似冇濕過咁，然後都到站落車，真係好有教養，呢位鍾意Miffy嘅後生仔同佢兩個朋友都值得一贊。」

https://www.facebook.com/photo?fbid=1315302747294242&set=a.602745725216618


https://www.hk01.com/%E7%86%B1%E7%88%86%E8%A9%B1%E9%A1%8C/60308737/%E5%85%83%E6%97%A6%E6%B8%AF%E9%90%B5%E5%A4%A7%E5%8F%94%E8%83%8C%E5%9B%8A%E7%8B%82%E6%BC%8F%E5%92%96%E5%95%A1-3%E7%94%B7%E7%94%9F%E5%80%9F%E7%B4%99%E5%B7%BE%E5%B9%AB%E6%8A%B9%E5%9C%B0-%E4%B9%98%E5%AE%A2-%E5%A5%BD%E6%9C%89%E6%95%99%E9%A4%8A?utm_medium=Social&utm_source=fbpost&utm_campaign=hottopics&fbclid=IwY2xjawPEJztleHRuA2FlbQIxMABicmlkETFxU1cxVnNLdHdweFBMVHdvc3J0YwZhcHBfaWQQMjIyMDM5MTc4ODIwMDg5MgABHkq75eLSNUHsc7hUTM9bI6gHfAH78ZLJ6hG74-hT2kjVQgoTdbZrV8bJ-JZ0_aem_OtoEW5XJfxVGYFG490SeLw