女兒英文名的由來。

 踏入6月，兩個女都就快接近生日啦，好似一直都冇講過關於兩個女嘅英文名嘅由來，潼潼出世冇耐之後，我就將改英文名嘅責任交咗俾老婆，不過我規定係要F字頭，老婆後來俾咗好多F字頭嘅名我揀，最終我揀咗用Fiona，因為其他實在太難讀。

用咗一段時間之後，有一日聽公子會森美訪問一位年輕女歌手，中文名叫黃淑蔓，英文名叫feanna，於是我就覺得相比fiona，feanna好似比較少人用，於是就直接問潼潼意願。問咗幾次佢都俾唔同答案我，於是我終於出最後一招，就係上網搵咗fiona嘅相同feanna嘅相再問佢，結果佢見到左邊嘅費安娜公主之後，決定改用feanna，就係咁，潼潼英文名響佢返學前就定咗為feanna。而細女就快出世嘅時候，我就決定幫佢改名為Jessica。

結果到佢出咗世之後，我上網一查先發覺，原來6月8號出世嘅名人除咗李柱銘同杜文澤之外，竟然仲有黃淑蔓，又會咁巧合都有嘅。至於……點解規定一個女用F字頭，一個女用J字頭英文字母？下次得閒先再寫。