「九龍城寨之圍城」之感想！

琴日睇完「九龍城寨之圍城」謝票場，先多謝紫龍請睇戲，睇完第一時間想寫感想，不過因為要趕返屋企，車程太短寫唔晒，所以今日先寫埋佢，第一感覺非常震撼，雖然從未去過九龍城寨，但睇得出場景佈置非常認真，還原度相當高，越睇越會有種令人置身其中嘅感覺，最出色一定係打鬥場面，拳拳到肉、緊張刺激、驚心動魄，每一位演員都十分落力。 四位年輕主角打戲最多，亦係打得最賞心悅目嘅，伍允龍奸到冇人有，亦都冇人奈得佢何，好睇在每一場仗都唔係勢均力敵，但四人同心協力、迎難而上果種熱血，真係令人睇到血脈沸騰，好耐冇試過睇戲會有呢種投入感。 驚喜嘅地方好多，第一：龍捲風、殺人王嘅兄弟情雖然寫得好短，但好到肉。第二：阿七雖然對白唔多，但好搶戲，喬大真係堅形。第三：由綠豆、教束已經開始留意劉俊謙，靚仔得黎好演技，今次佢演信一，性格可愛、忠誠、重情義，假以時日劉俊謙必成香港新一代最紅明星。 認識余兒十幾年，當年睇漫畫已經十分喜歡角色設定，上一代江湖情加新一代兄弟情寫得好好，睇完令我又想重溫小說同漫畫版，恭喜佢今日有咁嘅成績，由編劇、小說家到做出版社老闆，真係冇一樣野可以難到佢。 今次係我第一次睇戲有謝票場，琴日黎謝票嘅係喬靖夫同伍允龍，我坐得好近，所以可以影到兩位高手同觀眾一齊玩遊戲，伍允龍真係好大隻好型好搞笑，同戲中嘅大反派感覺完全相反，喬大唔駛講，文又得武又得，可惜兩位今日要去好多地方謝票，冇機會搵佢地合照。 琴日約埋阿棠同幾個朋友一齊睇，完場又見到pen so同葉sir，當然要第一時間集郵啦，未睇嘅朋友快d入場支持啦，入戲院睇先可以感受到果種震撼。