追看選戰。

記得當年睇hktv，追晒警界線同導火新聞線兩套劇，不過當想睇選戰時，個台就停咗，所以只睇咗頭幾集，非常可惜。不過最近因為hktv開放返幾套舊作供人免費睇，所以我又追返選戰，呢幾套hktv拍嘅戲製作的確好用心，睇完包你唔會再追tvb果d馬馬虎虎嘅劇。

而我想講嘅係……近年認識咗劇中一位演員，佢響警界線做古惑仔、導火新聞線係做一個黑警、而響選戰就飾演一個記者，雖然唔係主要角色，但係睇得出佢每一次演出都非常專業。

同一套劇入面，其他人演記者，見到新聞人物出現，會一踴而上，然後不停拍照，但係我留意咗好幾次，佢每次按完快門，會望一望鏡頭睇下自己影得好唔好，然後再拍下一張，而唔係不停按快門，對唔對到焦都唔知。呢個小動作只要見過真正嘅記者就會留意到，而好多時，用心嘅演員同普通演員嘅分別就係響呢度。

而出身演藝學院，有好多年舞台經驗嘅佢，會把握每一個演出機會，就算係一個鏡頭、一句對白，都要用心去演，可能大多數人都未必會留意呢d細節，但係我想講……其實只要用心演出，一定有觀眾留意到，我就係其中一個觀眾。

今次講嘅呢位專業嘅演員就係陳仕文，幾年前因「火鳳燎原亂世英雄舞台劇」而認識佢，佢不但負責整個舞台劇嘅統籌工作，而且身兼編劇同演員於一身，演出咗兩次嘅亂世英雄我都有睇，而劇中最多對白就嘅就係佢演嘅司馬懿，而佢嘅表現都係眾演員當中數一數二嘅，而且好少見佢有甩漏嘅情況，真係一位好專業好專業嘅演員。

今日就係陳仕文Franco嘅生日，在此祝佢生日快樂，女女快高長大，將來有多d演出機會。